अत्तरिया- गणतन्त्र दिवसको अवसरमा गोदावरी नगरपालिका वडा नं. २ मा रहेको श्री सुप समावेशी आधारभूत विद्यालयमा अन्तरक्रिया कार्यक्रम सम्पन्न भएको छ ।
कार्यक्रममा शिक्षक–कर्मचारी, अभिभावक, विद्यालय व्यवस्थापन समिति, शिक्षक अभिभावक संघ तथा विद्यार्थीहरूको अर्थपूर्ण सहभागिता रहेको थियो । कार्यक्रममा विद्यालयको वर्तमान अवस्था र भावी योजनाका साथै विद्यार्थीहरूको सिकाइ स्तर कसरी अभिवृद्धि गर्ने, शिक्षक तथा अभिभावकका समस्या, आवासीय समस्याको व्यवस्थापन तथा समाधानका उपायहरू, साथै सिकाइ प्रक्रियालाई अझ प्रभावकारी बनाउने विषयमा गहन छलफल गरिएको थियो ।
साथै, शिक्षक तथा कर्मचारीहरूबाट गुणस्तरीय शिक्षा प्रदान गर्ने, विद्यार्थीहरूको सिकाइ स्तर अभिवृद्धि गर्ने तथा शिक्षक आचारसंहिता पूर्ण रूपमा पालना गर्ने लगायतका विषयमा स्वघोषणा समेत जारी गरिएको थियो ।
विद्यालय व्यवस्थापन समितिकी अध्यक्ष विष्णा देवी बोहराको सभाध्यक्षतामा सम्पन्न उक्त कार्यक्रममा गोदावरी नगरपालिका वडा नं. २ का वडा सदस्य तथा शिक्षक अभिभावक संघका अध्यक्ष डबल सिंह साउद प्रमुख अतिथिका रूपमा उपस्थित हुनुहुन्थ्यो ।
कार्यक्रमको सञ्चालन विद्यालयका प्रधानाध्यापक देवी साउदले गर्नुभएको थियो भने अन्तरक्रिया कार्यक्रमको सहजीकरण संस्थापक अध्यक्ष मानबहादुर साउदले गर्नुभएको थियो ।